Shkollë verore për fëmijët nga diaspora

Fëmijët e bashkatdhetarëve që duan t’i kalojnë pushimet verore në Kosovë, e kanë një mundësi të mirë që të ndjekin mësimet në gjuhen shqipe, në shkollën verore “Albanica”, nga Kolegji “Universum” në Prishtinë. Kjo shkollë mundëson program të veçantë për fëmijë, përmes të cilit do të mësojnë gjuhën dhe kulturën shqipe.

Programi do të jetë i pranishëm në tri qytete të Kosovës, Prishtinë, Gjakovë dhe Ferizaj, gjatë muajit korrik dhe gusht. Ndërsa sipas njoftimi, programi ofron kulturë dhe gjuhë shqipe; vizita dhe ekskursione në vende historike; pjesëmarrje në teatër dhe në valle shqipe; aktivitete, lojëra e kënaqësi të tjera.

“Aktivitetet do të jenë të ndara në tri pjesë: Paradite, fëmijët do të mësojnë për trojet shqiptare (Shqipëri, Kosovë, Maqedoni, Mali i Zi, Luginë e Preshevës, Çamëri), dhe mësim të gjuhës shqipe. Në mesditë, do të kenë mundësi të vizitojnë teatrot, të mësojnë vallet shqipe, të dëgjojnë ligjëratë nga historianë dhe të shohin filma shqiptarë. Pasdite, do të vazhdohet me vizitë në Muzeun e Kosovës, Muzeun Etnologjik dhe qytetin e vjetër Ulpianën”, thuhet në njoftim.

Për të gjithë të interesuarit, që duan të regjistrojnë fëmijët e tyre, të cilët duke u argëtuar do të mësojnë gjuhën dhe kulturën shqipe, ekziston kontaktoni në kolegjin e lartpërmendur.