Shkrirja e akullnajës zbulon kufomën e shndërruar në mumie

Mendohet se këto mumie bëjnë pjesë në mesin e viktimave nga rrëzimi i dy aeroplanëve në këtë regjion që kanë ndodhur në vitin 1950 dhe 1966

Shkrirja e akullnajave që vjen si rezultat i ngrohjes globale sjell herë pas here gjetje interesante. Kështu në një akullnajë (gleçer) të shkrirë në Mont Blanc, një aventurist francez Daniel Roche ka hasur në mbetjet e mumifikuara mortore të një njeriu. Mes tjerash ai ka gjetur një dorë dhe pjesë të kofshës të shndërruara në mumie, shkruan spiegelonline.de.

Mendohet se këto mumie bëjnë pjesë në mesin e viktimave nga rrëzimi i dy aeroplanëve në këtë regjion. Njëri ka ndodhur në vitin 1950 dhe tjetri në vitin 1966. Bëhet fjalë për aeroplanët e Air India, transmeton albinfi.ch. Në aksidentin e parë kishin humbur jetën 48 veta e në të dytin 117.

Hulumtuesi amator Roche bën prej 15 vitesh kërkime të mbetjeve të viktimave në akullnaja. Ndërsa ngrohja e klimës bën që  këto të gjenden gjithnjë më shpesh. Vetëm dy javë më parë, në një gleçer në Zvicër janë gjetur kufomat e një çifti zviceran, të mbytur para 75 vitesh.