Shpallen fajtorët për vrasjen e veprimtarit Enver Hadri

Gjykata Penale e Brukselit ka nxjerrë fajtorë Veselin Vukotiqin, Andrija Drashkoviqin dhe Bozhidar Spasiqin për vrasjen me paramendim të Enver Hadrit. Dy pjesëmarrës të tjerë në vrasjen e Hadrit , Andrija Llakoniq dhe Darko Ashanin janë vrarë ndërkohë në Serbi

Vrasësit e veprimtarit të shquar kombëtar dhe të të drejtave të njeriut Enver Hadri janë shpallur fajtorë në gjykimin që ka përfunduar sot në Gjykatën Penale të Brukselit, Belgjikë. Këtë njoftim e ka dhënë familja e Hadrit, në një letër të nënshkruar nga Teuta Hadri, e bija e të ndjerit.

“Sot, më 22 nëntor, gjykata Penale e Brukselit ka nxjerrë fajtorë Veselin Vukotiqin, Andrija Drashkoviqin, dhe Bozhidar Spasiqin për vrasjen me paramendim të Enver Hadrit, thuhet në njoftimin e përmendur. Me këtë rast familja falënderuar avokatin e saj Choirstof Marchand dhe gjykatësit e çështjes.

Dy pjesëmarrës të tjerë të vrasjes së Hadrit , Andrija Llakoniq dhe Darko Ashanin janë vrarë ndërkohë në Serbi.

Vrasësit e Enver Hadrit ishin pjesëtarë të nëntokës serbe në Bruksel por njëherësh edhe zyrtarë të lartë të Sigurimit Shtetëror të ish – Jugosllavisë, UDB, që kontrollohen nga Serbia.

Megjithatë ende nuk është bërë shpallja e aktgjykimit. Ajo pritet të bëhet gjatë ditëve në vijim, thuhet veç tjerash në njoftimin e bërë nga Familja Hadri, e cila kishte kërkuar dënim me burg të përjetshëm për dorasit.

Familja Hadri në letrën e saj shprehet e kënaqur dhe e lehtësuar me vendimin e sjellë sot në Bruksel. Por ajo ka theksuar se është për t`u habitur neglizhenca e sistemit gjyqësor belg që e ka zvarritur kaq gjatë këtë proces.

Procesi i gjykimit ka filluar më 7 dhe ka përfunduar më 22 nëntor (sot).

albinfo.ch posedon tekstin e familjes Hadri lidhur me vendimin gjyqësor.