Shpetim (Tim) Qorraj ka falënderuar publikisht shqiptarët për mbështetjen gjatë zgjedhjeve në Shtetet e Bashkuara të Amerikës, ku arriti të sigurojë 14.276 vota, transmeton albinfo.ch.
Përmes një mesazhi falënderues, ai ka shprehur mirënjohje për të gjithë ata që e mbështetën, si në SHBA, ashtu edhe në Kosovë dhe vende të tjera të botës.
Qorraj ka theksuar se, ndonëse këtë herë nuk arriti të fitojë, vlerëson besimin e qytetarëve dhe kontributin e komunitetit gjatë fushatës zgjedhore.
Ai gjithashtu ka shprehur shpresën që mbështetësit të jenë ndier krenarë me angazhimin dhe punën e tij, duke theksuar se përkrahja e marrë dhe gjurmët e lëna në komunitet kanë rëndësinë e tyre.
Në fund, Qorraj ka falënderuar të gjithë ata që i kanë shkruar, telefonuar dhe qëndruar pranë tij gjatë kësaj gare zgjedhore. /Albinfo.ch
