Shqipëri, një i vdekur nga ethet hemorragjike

Një 30-vjeçar humbi jetën në Spitalin Universitare “Nënë Tereza”, ndërsa vëllai i tij 35-vjeçar, baba i tre fëmijëve, ndodhet në gjendje kritike nga “ethet hemorragjike”

Një qytetar shqiptar ka vdekur në spitalin e Tiranës dhe një tjetër (vëlla i viktimës) është në gjendje kritike nga ethet hemorragjike. Bëhet fjalë për dy vëllezërit Gjorgji nga Dibra, të cilët dyshohet se janë prekur nga virusi i rrezikshëm Apa, gjatë kohës sa po i kullosnin bagëtinë në mal.

Vëllai më i vogël 30-vjeçar, humbi jetën dy ditë më parë në Qendrën Spitalore Universitare “Nënë Tereza”, ndërsa 35-vjeçari Nuri Gjorgji, baba i tre fëmijëve ndodhet në gjendje kritike në reanimacionin e infektivit, pasi “ethet hemorragjike” i kanë prekur organet jetësore, sidomos veshkat.

Dy vëllezërit kanë qenë duke i kullosë bagëtinë në zonën e Kalasë së Dodës në Dibër të Shqipërisë.

Dëmtimi më i rëndë që paraqet pacienti është insuficienca renale akute, raporton “mapo”.

Infektologu Pëllumb Pipero sqaroi për mediat gjendjen e rëndë të pacientit, ndërsa thotë se shkaktar për “ethet hemorragjike” mund të jenë ose rezervuarët e ujit ose rriqrat që gjenden në bagëti.
Pesë ditë më parë dy vëllezërit Gjorgji në rrethana ende të panjohura, u infektuan me virusin Apa duke shfaqur sindromat e “etheve hemorragjike”. Ata u transportuan fillimisht në spitalin e Peshkopisë, por për shkak të gjendjes së vështirë shëndetësore u dërguan me urgjencë në Spitalin e Infektivës në Qendrën Spitalore “Nënë Tereza” në Tiranë.