Shqipëri-Serbi, marrëdhëniet tregtare kanë shënuar rritje

Shkëmbimet tregtare Shqipëri-Serbi, nga vitit në vit kanë është rritur dukshëm dhe vetëm në vitin 2013, tregtia arriti në 170 milionë dollarë nga 30 milionë sa ishte në vitin 2007

Pavarësisht se marrëdhëniet politike ndërmjet Shqipërisë dhe Serbisë kanë qenë të ftohta, kjo nuk ka ndikuar edhe në relacionet tregtare ndërmjet Tiranës e Beogradit. Madje shkëmbimet tregtare nga vitit në vit kanë është rritur dukshëm dhe vetëm në vitin 2013,  tregtia arriti në 170 milionë dollarë nga 30 milionë sa ishte në vitin 2007.

Të dhënat e Institutit të Statistikave për import-eksportet mes dy vendeve, tregojnë për rritje të theksuar ekonomike.

Shqipëria importon nga Serbia energji elektrike, ushqime, produkte kimike, metale e materiale ndërtimi ndërsa eksporton drejt Serbisë energji elektrike, ushqime (përgjithësisht zarzavate) dhe materiale ndërtimi e metale, citon BW.

“Të dhënat e tregtisë së jashtme të raportuara nga INSTAT nuk janë të plota për shkak se energjia elektrike zakonisht regjistrohet si e importuar nga vendi ku është regjistruar kompania që ia shet Shqipërisë dhe disa kompani të tilla janë të regjistruara në vende të tjera pavarësisht se janë kompani serbe”, thuhet në raport.

Përveç energjisë së importuar në linjën Beograd-Podgoricë-Shqipëri, kjo e fundit ia shet, përgjithësisht disa kompanive serbe që dominojnë tregun energjetik të Ballkanit, energjinë e prodhuar tepër në kaskadën e Drinit në periudhat me shumë reshje.

Ndërsa importi tjetër i rëndësishëm i Shqipërisë nga Serbia është ai i skrapit, i cili shkrihet në Elbasan. Po ashtu rritja më e qëndrueshme e importeve të Shqipërisë nga Serbia, sipas të njëjtave statistika, i përket grupit ushqim, pije dhe duhan.

“Në vitin 2007, në Shqipëri u importuan rreth 346 milionë lekë (3.4 milionë dollarë), ushqime nga Serbia ndërsa në vitin 2013, importet e këtij grupi arritën në 4.8 miliardë lekë (48 milionë dollarë)”, citon BW, statistikat zyrtare.

Importet e drithit nga Serbia, po ashtu thuhet se zunë pjesën më të madhe të importeve. “Gjatë vitit 2013, Shqipëria importoi 81 mijë tonë drithë nga Serbia me vlerë të përgjithshme prej 2.9 miliardë lekësh (29 milionë dollarë). Serbia zë një të pestën e të gjitha importeve të drithit në Shqipëri”, thuhet në statistika.