Shqipëria dhe Serbia, shumë më pak raste se Kosova

Foto: Ministria e Shëndetësisë e Kosovës

Shqipëria ka regjistruar sot tri herë më pak raste se Kosova, ndërsa Serbia ka pasur më pak të infektuar, edhe pse ka testuar dyfish më shumë qytetarë. Ndërkaq sot në Kosovë është shënuar rekord i të infektuarve që nga fillimi i pandemisë.

Në Shqipëri nga 5 mijë e 339 testime, janë shënuar 379 raste të reja, ndërkaq në Serbi në 24 orët e fundit nga 11 mijë e 324 teste kanë rezultuar pozitivë 1 mijë e 72 persona.

Në anën tjetër, trendi i rritjes së rasteve pozitive në Kosovë ka vazhduar gjatë ditëve të fundit, teksa sot ka pasur sërisht rekord të rasteve të reja që nga fillimi i pandemisë pasi gjatë 24 orëve të fundit janë infektuar 1128 persona nga 7 mijë e 424 teste për COVID-19.

Në 24 orët e fundit janë dhënë 19.248 doza të vaksinës kundër COVID-19, prej fillimit të vaksinimit në të gjitha qytetet e Kosovës janë dhënë 559.007 doza të vaksinës, deri më sot 192.503 qytetarë janë vaksinuar me dozën e dytë.

Nga 7.424 testime, 1.128 qytetarë kanë rezultuar pozitivë me virusin COVID-19.

Gjatë 24 orëve të fundit, janë shënuar 3 raste të vdekjes.

Sot janë shëruar 46 qytetarë, derisa numri i përgjithshëm i të shëruarve është 106.009.

Në total numri i rasteve aktive është 5.493.