Shqipëria me Komitet për Diasporën

Kryeministri Berisha tha se Komiteti i Diasporës do të bëjë çdo gjë për t’u gjendur afër shqiptarëve, "nga Zelanda e Re, Alaska e deri te Poli i Veriut"

Kryeministri i Shqipërisë, Sali Berisha ka paralajmëruar Këshillin e Ministrave për ngritjen e Komitetit të Diasporës, një institucion në nivel ministror, i cili sipas tij, do të shërbejë si pikë lidhjeje me Tiranën për të gjithë emigrantët, kudo ku ata ndodhen.

Siç tha kryeministri Berisha, ky vendim është vonuar, prandaj kërkoi nga kabineti i tij që të merret me përparësi.

“Ky Komitet është një detyrim i madh moral që u kemi shqiptarëve në të katër anët e botës. Fati na bëri që të kemi më shumë diasporë, se shqiptarë në trojet shqiptare. Në këtë aspekt, u duhet kërkuar ndjesë shqiptarëve kudo që janë, se nuk ka qenë e mundur të kenë mbështetjen e merituar të Shqipërisë, por i garantoj se realizimi i saj është përparësi madhore”, u shpreh Berisha, raportojnë mediet shqiptare.

Komiteti i Diasporës, sipas kryeministrit, do të bëjë çdo gjë për t’u gjendur afër shqiptarëve në të katër anët e planetit, nga Zelanda e Re, Alaska e Poli i Veriut.

“Dikush më bëri një mesazh, ku më thoshte: “Ju përshëndes nga Poli i Veriut në Finlandë”. Komiteti i Diasporës do të bëjë ço gjë, do të përpunojë praktikat e skemat më të mira, në mënyrë që të gjendemi më pranë tyre, më pranë njëri-tjetrit”, tha kryeministri shqiptar.

Po ashtu në mbledhjen e fundit të Qeverisë, kryeministri Berisha u kërkoi ministrave që brenda 10 ditëve të nxjerrin në faqen e tyre në internet numrin e telefonit, ku qytetarët të denoncojnë korrupsionin.
Sipas gazetës “panorama”, kryeministri tha se vartësit e tij mund të përdorin edhe faqen e Facebook-ut për të komunikuar me qytetarët.

“Në mënyrë të veçantë është e domosdoshme të funksionojnë linjat f alas. Zoti sekretar i Përgjithshëm, të merren masat që të gjitha ministritë të kenë linjë falas për qytetarët, për të paraqitur ankesat e tyre për korrupsionin, ai që njihet si numri jeshil. Kjo duhet të vendoset brenda 10 ditëve”, tha ai.