Shqipëria në hall me zjarret, digjet dhjetëra hektarë pyje

Siç raportojnë mediat nga Tirana, aktualisht janë duke u djegur sasi të pyjeve në Qarkun e Fierit dhe të Elbasanit, ndërkohë shërbimet zjarrfikëse kanë ndërhyrë për të shuar flakët pavarësisht vështirësive të terrenit

Autoritetet shqiptare të emergjencave kanë lajmëruar për tri vatra të reja zjarri  gjatë orëve të paditës në Shqipërinë e Mesme. Siç raportojnë mediat nga Tirana, aktualisht janë duke u djegur sasi të pyjeve në Qarkun e Fierit dhe të Elbasanit, ndërkohë shërbimet zjarrfikëse kanë ndërhyrë për të shuar flakët pavarësisht vështirësive të terrenit.

Në fshatin Lekaj të Lushnjës ka rënë zjarr në një masiv me pisha. Flakët të ndihmuara edhe nga era e fortë janë përhapur me shpejtësi. “Si pasojë e flakëve është djegur një sipërfaqe prej rreth 10 hektarësh me shkurre dhe pisha. Aktualisht zjarri është izoluar dhe po punohet për shuarjen e tij. Sipas informacioneve paraprake dyshohet se zjarri ka qenë i qëllimshëm”, thuhet në njoftim, transmeton TCH.

Vatra tjetër e zjarrit në qarkun e Fierit ka rënë në një sipërfaqe me pisha në fshatin Gjorgos e Cakran, Fier. Në vendngjarje kanë shkuar zjarrfikëset e Fierit dhe ato të Patosit për të shuar flakët. Si pasojë e zjarrit një sipërfaqe prej rreth 3 ha me shkurre është djegur. Po ashtu në këtë rajon, por edhe në Vlorë, janë djegur sasi të mëdha të ahut dhe pishave.