Shqipëria në heshtje zgjedhore

Dita e shtunë është përcaktuar si ditë e reflektimit të qytetarëve përballë alternativave dhe për të vendosur për më të mirën

Nga mesnata e të premtes Shqipëria ka hyrë në heshtjen zgjedhore. Pas një fushate elektorale intensive, vendi sot është në heshtje të plotë zgjedhore, për t`i hapur rrugën ditës së votimeve të dielën, më 23 qershor.

Dita e shtunë është përcaktuar si ditë e reflektimit të qytetarëve përballë alternativave dhe për të vendosur për më të mirën. Fushata elektorale u mbyll pothuajse në të njëjtin orar prej dy partive politike më të mëdha në vend.

Ditën e dielë qendrat e votimit do të hapen për votuesit në orën 7 të mëngjesit dhe do të mbyllen në orën 19:00. Në këto zgjedhje, statistikat zyrtare të Ministrisë së Brendshme regjistrojnë 3 milionë e 271 mijë e 956 zgjedhës.

Sipas kodit zgjedhor, fushata elektorale përfundon 24 orë para datës së zgjedhjeve dhe ia lë vendin heshtjes zgjedhore, e cila përfundon në momentin që mbyllet votimi ditën tjetër.

Në periudhën e heshtjes zgjedhore nuk lejohet asnjë lloj fushate zgjedhore nëpërmjet organeve të medias, si dhe zhvillimi i mitingjeve ose i veprimtarive të tjera zgjedhore të subjekteve zgjedhore, shkruajnë mediet në Tiranë.

Subjektet politike janë të ndarë në dy koalicione të mëdha, ‘Aleanca për Punësim, Mirëqenie dhe Integrim’ i udhëhequr nga PD me 24 parti politike dhe ‘Aleanca për Shqipërinë Evropiane’ e udhëhequr nga Partia Socialiste tubon me 40 parti politike.

Kësaj gare i bashkëngjiten edhe dy partitë FRD dhe Aleanca Kuq e Zi, gjithashtu si të pavarur do të konkurrojnë edhe Arben Malaj, Dritan Prifti dhe emra tjerë në disa qarqe.

Në zgjedhje do të marrin pjesë të gjithë shtetasit shqiptarë, mbi 18 vjeç, përfshirë këtu edhe ata që mbushin këtë moshë më 23 qershor, të cilët kanë të drejtë të votojnë. Për të votuar duhet të jenë të pajisur me një dokument identifikimi, kartë identiteti ose pasaportë.