Shqiptarët pas 24 vitesh e humbin Ulqinin

Me fitoren e Partisë së Gjukanoviqit u shpreh i befasuar kryetari i deritashëm i Ulqinit dhe përfaqësuesi i Forcës së Re Demokratike, Nazif Cungu

Pas 24 vitesh, partitë politike shqiptare kanë humbur komunën e Ulqinit, duke ia mundësuar partisë së kryeministri Milo Gjykanoviqit, që ta drejtojë këtë komunë bregdetare gjatë mandatin e ardhshëm. Shqiptarët e humbën këtë komunë në zgjedhjet e jashtëzakonshme që u mbajtën të dielën.

Fituese e këtyre zgjedhjeve doli partia e kryeministrit Milo Gjukanoviq (PDS), duke e mundur kryetarin e deritanishëm, Nazif Cungu.

Me fitoren e Partisë Demokratike Socialiste (PDS) është shprehur i befasuar kryetari i deritashëm i Ulqinit dhe përfaqësuesi i Forcës së Re Demokratike, Nazif Cungu. Ai ka tha se nuk ka besuar se partia e Gjukanoviqit t’i marrë 9 asamblistë në Kuvendin Komunal.

“Ky rezultat do të shërbente si shkollë për FRD-në që të punojë më shumë e më mirë në të ardhmen”, thuhet në reagimin e Cungut, i cili shprehet optimist se partia e tij do të punojë dukshëm në terren për ta rikthyer partinë në krye të Ulqinit.

“Në fund kryetari i Forcës deklaroi se pavarësisht nga kjo betejë, lufta e Forcës në mbrojtjen e interesave të shqiptarëve dhe në përmbushjen e programit të vetë politik nuk do të ndalet, por do të vazhdojë edhe më fuqishëm në të ardhmen”, thuhet në deklaratën e Forcës së Re Demokratike.

Në zgjedhjet e jashtëzakonshme, Partia Demokratike Socialiste (PDS) fitoi  9 mandate, Forca e Re Demokratike, 8 mandate, Koalicioni “Bashkë për të ardhmen e Ulqinit” 7 mandate, Unioni Demokratik i Shqiptarëve (UDSH) 3 mandate, Partia Socialdemokrate (PSD) 2 mandate, Mali i Zi Pozitiv 2 mandate, Partia Socialiste Popullore (PSP) 1 mandat dhe Fronti Demokratik, 1 mandat.

Ndryshe, sipas statistikave demografike, 71 për qind e popullsisë në komunën e Ulqinit janë shqiptarë, 12 për qind malazezë, 6 për qind boshnjakë, 6 për qind  serbë…

Prandaj, përçarjet e mëdha brenda shqiptarëve kanë ndikuar që zgjedhjet t’i fitoj një parti malazeze.