Shqiptarët, populli më i defaktorizuar në Ballkan

Republika e Kosovës dhe ajo e Shqipërisë duhet të jenë më aktive për t’i zgjidhur problemet e shqiptarëve që jetojnë jashtë këtyre dy shteteve

Për shkak të mungesës së unitetit ndërmjet subjekteve politike, si dhe logjikës së bajraktarizmit të liderëve politikë, populli shqiptar edhe pse nga aspekti demografik është i përafërt me popullin serb e grek, po mbetet i defaktorizuari. Kështu të paktën vlerësojnë njohës të rrethanave politike, të cilët shprehin shqetësimin e tyre për gjendjen e shqiptarëve që jetojnë në Maqedoni, Mal të Zi e Luginë të Preshevës.

Sipas tyre, Republika e Kosovës dhe ajo e Shqipërisë duhet të jenë më aktive për t’i zgjidhur problemet e shqiptarëve që jetojnë jashtë këtyre dy shteteve, citon gazeta “Zëri”.

Politologu, Belul Beqaj, ka thënë se gjendja e shqiptarëve aktualisht është e paartikuluar qartë sa i përket mundësisë së faktorizimit të tyre në Ballkan. Sipas tij, shansin që e patëm me shpërbërjen e sistemit socialist dhe rënies së Murit të Berlinit shqiptarët nuk janë duke e shfrytëzuar në përputhje me kontekstin e favorshëm të rrethanave.