Shqiptarët punojnë pa pagesë në familjet e tyre

Afër 277 mijë shqiptarë punojnë pa pagesë në familjet e tyre, ose 24% të numrit total të të punësuarve në ekonomi

Sipas statistikave afër 277 mijë shqiptarë punojnë pa pagesë në familjet e tyre. Sipas të dhënave nga Instituti i Statistikave të Shqipërisë për vitin 2016 të vetëpunësuarit në familje përbënin 24% të numrit total të të punësuarve në ekonomi.

Duke krahasuar me vitin 2015, pesha e punësimit pa pagesë në familje ka pësuar një rënie me rreth gjashtë pikë përqindjeje ndaj numrit total të të punësuarve.

Kësaj shifre i shtohet edhe rreth 373 mijë të vetëpunësuar pa pagë në aktivitetet e tyre private, në total janë rreth 650 mijë shqiptarë ose rreth 56% e gjithë numrit të të punësuarve që hyjnë në kategorinë e ashtuquajtur “punësim i brishtë”, shkruajnë mediat shqiptare.

Ky lloj punësimi klasifikohet si i brishtë, sepse, ose nuk siguron të ardhura në rastin e të punësuarve pa pagesë në familje, ose bart më shumë rreziqe për punësimin afatgjatë, në rastin e të vetëpunësuarve, përcjell albinfo.ch.