Shteti evropian që jep para për të shkuar në restorant

Kjo është ndërmarrë për të ndihmuar gastronominë që ka pasur mjaft humbje në muajt e fundit

Një nga sektorët më të prekur nga pandemia Covid-19 është gastronomia. Në mbarë botën humbjet kanë qenë të mëdha, kurse shumë qeveri kanë ndërmarrë iniciativa të ndryshme për të shpëtuar gastronominë dhe punëtorët që punojnë në këtë sektor.

Një nga vendet është edhe Malta. Qeveria e këtij vendi do t’iu ndajë qytetarëve kuponë në vlerë prej 100 eurosh, për t’i shpenzuar në bare, hotele dhe restorante, përcjell albinfo.ch.

Rreth çereku i bruto-prodhimit të brendshëm të Maltës vjen nga turizmi, i cili është ndërprerë plotësisht për shkak të pandemisë së koronavirusit.

Për t’i dhënë shtytje ekonomisë, qeveria planifikon t’iu ndajë të gjithë qytetarëve mbi 16 vjeç nga pesë kuponë prej 20 eurosh. Megjithatë, katër nga këta pesë kuponë duhet të shpenzohen në hotele dhe restorante.

Gjithashtu punëtorëve të turizmit, ndërkaq, paga subvencionuese prej 800 eurosh do t’iu vazhdojë deri në shtator.

Malta ka konfirmuar 630 raste të të infektuarve me koronavirus. Prej tyre, nëntë kanë vdekur.

---