Shtrenjtohen produktet ushqimore

Enti i Statistikave në Maqedoni thotë se harxhimet për jetesë janë rritur 0.2 për qind. Qytetarët ndërkaq thanë se më shumë se gjysmën e pagës e harxhojnë për ushqim

Qytetarët e Maqedonisë nuk i besojnë të dhënave që ka publikuar Enti Shtetëror i Statistikave, i cili thotë se harxhimet për jetesë janë rritur vetëm 0.2 për qind gjatë muajit të fundit. Qytetarët thonë se më shumë se gjysma e pagës e shpenzojmë për produktet elementare ushqimore.

Të dhënat e Entit Shtetërorë të Statistikave bëjnë të ditur se rritje më të madhe kanë pësuar produktet e qumështit, për 0.7 për qind, si dhe ilaçet dhe mjetet ndihmëse shëndetësore për 6.4 për qind krahasuar shtatorin me gushtin e këtij viti.

Fadil Hasani është pensionist, ndërsa tregon se të ardhurat e tij janë 12 mijë denarë (200 euro). “Pothuajse të gjitha shkojnë për ushqim, sepse janë të vetmet të ardhura në familjen e tij 6 anëtarëshe”, deklaroi ai, citon REL.

Sipas tij, të gjitha çmimet janë rritur, buka, qumështi dhe prodhimet në tregun e gjelbër.

“Me një mijë denarë (rreth 15 euro) sot mund të blej vetëm 2 kg fasule, 2kg patate dhe spinaq, e tani më mbetën para vetëm edhe për një lakër. Pra, i gjithë pensioni më shkon për ushqim, unë as që mund ta mendoj se mund të shkoj diku ose të bëj ndonjë investim me këtë pension që e kam”, thotë ai.

Edhe Kateriana Dimoska pohon se produktet ushqimore shënojnë rritje, sepse është e vështirë të kursehet në produktet elementare ushqyese. 

“Po produktet ushqimore janë ato që bëhen më të papërballueshme për buxhetin familjar, sepse nuk mund të kursehet në produktet elementare për mbijetesë, me 8 mijë denarë sa është rroga ime, dhe me një student në familje, në gjithçka më duhet të kursej”, shprehet Katerina.

Ndërsa Imer Veliu, thotë se rroga në Maqedoni nuk e ka atë vlerën e mëparshme. Ai tregon se më parë ai arrinte të lidhë muajin me muaj, por tani duhet të bëjë dhe një punë shtesë në orët e pasdites duke ndihmuar tregtarët të mbledhin mallin:

Ndryshe, gjatë javës, partia maqedonase në opozitë, ajo Liberal Demokrate, ka bërë të ditur se rroga mesatare mujore në Maqedoni është më e ulëta në Ballkan. Këto të dhëna janë bazuar në një studim të agjencisë “Anadolija”, sipas të cilit Maqedonia renditet e fundit madje edhe nga shtetet e ish-Jugosllavisë dhe Ballkanit në përgjithësi.