Përfundon diskutimi publik i Udhëzimit Administrativ për zgjedhjet në veri

Diskutimi publik lidhur me draftin e Udhëzimit Administrativ është mbajtur nga 26 gushti deri më 31 gusht.

Për takimin e mbajtur sot, kryeshefi i grupit punues të Udhëzimit Administrativ, Besim Murtezani, nga Ministria e Administrimit të Pushtetit Lokal, thotë për Gazeta Blic se janë pranuar një varg vërejtjesh dhe sugjerimesh, përcjell albinfo.ch.

Ai ka thënë se për hartimin e këtij udhëzimi që u mundëson qytetarëve të komunave të Kosovës shkarkimin e kryetarëve të tyre përmes peticionit nevojiten edhe tre apo katër ditë deri në përfundimin e tij.

Ai theksoi se drafti do të përfundojë të martën dhe më pas do t’i mbetet ministrit Krasniqi që ta nënshkruajë.

“Ne kemi punuar sot dhe i kemi inkorporuar shumicën e vërejtjeve dhe sugjerimeve. Udhëzimi ka qenë nga 26 deri dje dhe sot i kemi inkorporuar vërejtjet dhe e kemi përgatitur draftin për nënshkrim. Pastaj nënshkruhet nga ministri. Edhe tre ose katër ditë përfundon grupi me punën e vet e pastaj ministri mbetet që ta nënshkruajë. Të martën përfundon drafti i grupit punues”, deklaron Murtezani.

Ndryshe, disa ditë më parë ministri i Administrimit të Pushtetit Lokal, Elbert Krasniqi, ka dhënë detaje në lidhje me procedurat për dorëheqjen e katër kryetarëve në komunat në veri.

Ai ka sqaruar se Grupi Punues i themeluar duhet ta finalizojë Projekt-Udhëzimin Administrativ dhe ta procedojë deri me datën 1 shtator të këtij viti, duke pohuar se kjo do të vlejë për gjithë vendin, e jo vetëm për veriun./Albinfo.ch