Shtypi gjerman: Edhe kriza greke, shkak për eksodin shqiptar!

Numri i refugjatëve nga Shqipëria të ardhur në Berlin gjatë tërë vitit 2014 ka qenë disa dhjetëra ndërsa gjatë këtyre gjashtë muajve, 1768

Krahas shkaqeve të njohura si problemet ekonomike dhe mungesa e perspektivës, për ikjen e qytetarëve nga Shqipëria drejt Gjermanisë identifikohet edhe tjetër: ashpërsimi i krizës ekonomike në Greqi. Kështu shkruan portali gjerman welt.de.

Këtë e tregon edhe fakti se numri i refugjatëve nga Shqipëria të ardhur në Berlin gjatë tërë vitit 2014 ka qenë gjithsej disa dhjetëra ndërsa vetëm gjatë këtyre gjashtë muajve të vitit 2015 kërkesën për azil e kanë bërë 1768 shtetas shqiptarë. Gjatë qershorit kanë qenë 515 që e kanë bërë një kërkesë të tillë.

Shpjegimi i lidhjes së krizës greke me rritjen e migracionit shqiptar në Gjermani, sipas welt.de është se në Greqi jetojnë shumë shqiptarë të cilët tash me një vizë turistike udhëtojnë në Berlin për të bërë një kërkesë azili.

Sekretari gjeneral i CDU-së Kai Wegner ka thënë se këta njerëz “janë pengesë për strehimin e dinjitetshëm të refugjatëve të tjerë. Për këtë arsye CDU e Berlinit kërkon shpejtim të procedurës së azilit dhe dëbim më të shpejtë. Ndërkaq, sekretari shtetëror për çështje sociale, Dirk Gerstle, po ashtu nga CDU-ja ka thënë se “shqiptarët trajtohen njësor , sikurse të tjerët që kanë një shans më të madh të qëndrimit në Gjermani”.