Shuhet këngëtari i famshëm, Françesk Radi!

Françesku nuk do të interpretojë dot më muzikë me tingujt e ëmbël të kitarës, por këngët dhe muzika që prodhoi do të mbeten përjetësisht në kujtesën tonë

Në moshën 67 vjeçare, është ndarë nga jeta këngëtari dhe kitaristi i njohur shqiptar, Françesk Radi, i cili pas vetes la një numër të madh këngësh që njihen si perlat e dekadave të fundit. Françesku nuk do të interpretojë dot më muzikë me tingujt e ëmbël të kitarës, por këngët dhe muzika që prodhoi do të mbeten përjetësisht në kujtesën tonë.

Françesk Radi ndërroi jetë pasditen e 3 prillit në repartin e reanimacionit në Qendrën Spitalore në Tiranë, ku edhe qëndronte i shtruar prej disa ditësh për shkak të gjendjes së rënduar shëndetësore. Artisti pësoi një hemorragji cerebrale, e cila i mori atij jetën në moshën 67-vjeçare, shkruan TCH, transmeton Albinfo.Ch.

Françesk Radi ka marrë pjesë në disa festivale të muzikës së lehtë shqiptare. Këngët e para të realizuara prej tij janë në vitet ’70, “Adresa” dhe “Biçikleta”. Ishin pikërisht këto dy këngë me të cilat u prezantua suksesshëm me publikun. Më pas krijimtaria e tij muzikore do të shënonte sërish një tjetër kulm pas viteve ’90 duke sjellë disa krijime, si në 1996 “Rroku i burgut”, “Humba pranverën”, “Telefonatë zemrash”, “Zemër e lodhur”, “Ky fat na ra”, etj.

Françesk Radi kreu Liceun Artistik dhe më pas Akademinë e Arteve në Tiranë. Ka punuar gjatë në estradë si kitarist dhe kantautor.