Sllovenia voton pro njohjes së Palestinës

Keystone EPA/SEBASTIAO MOREIRA

Sllovenia ka vendosur të njohë Palestinën si shtet të pavarur. Parlamenti i këtij shteti ka votuar të martën për të përkrahur këtë vendim me 52 vota pro dhe asnjë kundër.

Televizioni Publik i Sllovenisë bën të ditur se në seancën e 73-të të jashtëzakonshme, pas komplikimeve të shumta procedurale dhe akuzave të ndërsjella për shpërdorim të procesit, me 52 vota pro dhe asnjë kundër, deputetët miratuan propozimin e qeverisë që Sllovenia të njohë Palestinën si shtet të pavarur dhe sovran.

Raportohet se partia opozitare NSi, në fillim të debatit tha se kjo ishte një lëvizje parazgjedhore e koalicionit, por bëri të ditur se nuk do të ishte kundër vendimit.

Sllovenia u bë kështu anëtari i 147-të i Kombeve të Bashkuara që njohu Palestinën.

Kryeministri Robert Golob në fjalën e tij hapëse heksoi se Sllovenia ka qenë e detyruar të njohë Palestinën për të paktën 32 vjet, pasi kanë kaluar 32 vjet që Palestina ka njohur të drejtën për vetëvendosje për sllovenët.

“E drejta që ëndërruam për një mijë vjet u arrit vetëm 33 vjet më parë. Fatkeqësisht, kombi palestinez nuk e ka arritur ende këtë të drejtë,” tha Golob, duke kujtuar se 146 vende në mbarë botën e njohën Palestinën dhe Sllovenia do t’i bashkohet si e 147-ta.