Sommaruga dhe Bellen, si “qytetarë normalë”, në metronë e Vjenës

Ndërsa Sommaruga udhëtimin nga Cyrihu në Vjenë e ka bërë me trenin e natës dhe jo me aeroplan, siç bëhet zakonisht

Presidenti i Austrisë, Alexander van der Bellen, ka pritur sot homologen e tij zvicerane, Simonetta Sommaruga. Temë bashkëbisedimi ka qenë mbrojtja e klimës, gjegjësisht përmbushja e zotimeve për reduktim të emetimit të CO2, shkruan albinfo.ch.

Në këtë drejtim, presidentja federale e Zvicrës ka shpallur planin e saj dhe të shtetit zviceran që deri në vitin 2050 Zvicra të arrijë objektivin e një vendi “neutral” edhe sa i përket klimës.

Por më shumë se bisedimet në mes të dy presidentëve, kureshtjen e publikut e kanë ngjallur disa fotografi të publikuara në Instagram të dy kryeshtetasve, shkruan albinfo.ch. Në to shihen Sommaruga dhe van der Bellen të ulur fare normalisht në një vagon të metrosë së Vjenës.

Ndërsa Sommaruga udhëtimin nga Cyrihu në Vjenë e ka bërë me trenin e natës dhe jo me aeroplan, siç bëhet zakonisht. Me këtë rast ajo ka dëshmuar edhe praktikisht seriozitetin e saj sa i përket mbrojtjes së ambientit. Nga ana tjetër, van der Bellen, i cili është politikan i gjelbër dhe si i tillë, ambientalist i bindur, i është bashkuar mysafires së tij në metro, prej nga kanë dalë edhe fotografitë e përmendura.

---