Sondazhi: 79% e kosovarëve nuk duan koncesione me Serbinë

Qytetarët e Kosovës nuk duan koncesione me Serbinë. Një rezultat i tillë ka dalë nga një sondazh mbarëkombëtar nga Qendra për Perceptime në Hulumtime të Institutit Republikan Ndërkombëtar (IRI).

Qytetarët janë pyetur nëse duhet t’i bëhet ndonjë koncesion Serbisë për ta marrë njohjen e pavarësisë nga ajo.

Të pyetur se çfarë koncesione do të duhej të bëjë Kosova për njohjen e Serbisë, 79% e qytetarëve kanë thënë se s’duhet të bëhet asnjë koncesion i vetëm.

Ndërkohë, vetëm 5% e qytetarëve kanë thënë që për njohjen e Serbisë ia vlen të themelohet edhe Asociacioni njëetnik për komunat serbe, transmeton Express, përcjell Albinfo.ch.

Qeveria e Kosovës tashmë është futur në negociata dhe ka pranuar të diskutojë për formën e Asociacionit për komunat me shumicë serbe, ndërkohë që Serbia është e vendosur për të mos e njohur pavarësinë e Kosovës.

Kryeministri Albin Kurti e ka përsëritur disa herë që nuk do ta lejojë një Asociacion me kompetenca ekzekutive e as me karakter njëetnik, megjithatë një tip i pajtueshëm Asociacioni për të dyja shtetet nuk është gjetur deri më sot./Albinfo.ch