Sot votohet për apo kundër shkarkimit të kryetarëve të veriut

Qytetarët e katër komunave në veri të Kosovës do të votojnë sot nëse duan t’i shkarkojnë kryetarët aktualë komunalë.

Qendrat e votimit në Mitrovicë të Veriut, Leposaviq, Zubin-Potok dhe Zveçan u hapen nga ora 7 e mëngjesit.

Lista Serbe ka bërë thirrje për bojkotim të këtij votimi.

Kryetarët shqiptarë të Zveçanit, Zubin-Potokut, Leposaviqit e Mitrovicës së Veriut i morën mandatet në prill të vitit të shkuar nëpërmjet zgjedhjeve që po ashtu janë bojkotuar nga serbët, me thirrjen nga Lista Serbe.

Për t’i shkarkuar kryetarët duhet votuar 50 për qind plus një votues, që procesi të rezultojë i suksesshëm dhe të mbahen zgjedhje të jashtëzakonshme.

Erden Atiq është kryetar i Mitrovicës së Veriut, Ilir Peci i Zveçanit, Lulzim Hetemi i Leposaviqit dhe Izmir Zeqiri i Zubin-Potokut.