Sot voton mërgata e Maqedonisë për parlamentin e vendit

Nga Zvicra, për deputet të Parlamentit të Maqedonisë kanë kandiduar Ismail Beluli (BDI) dhe Enver Osmani (RDK)

Nesër, më 27 prill në Maqedoni zhvillohen zgjedhjet për parlamentin e vendit. Ndërkohë sot, një ditë më parë votat e tyre për parlamentin në fjalë i japin shtetasit e Maqedonisë që jetojnë jashtë vendit, mërgimtarët.

Parlamenti i Maqedonisë, nën kushte specifike mundëson vende deputetësh edhe për diasporën.

Deputetët e zgjedhur nga votat e mërgatës së Maqedonisë, vijnë nga tri zona zgjedhore: një nga votat e diasporës që jeton në Australi, një nga votat e diasporës që jeton në Amerikë, dhe një nga votat e diasporës që jeton në Evropë.

Mërgimtarët mund të votojnë nëpër ambasadat dhe përfaqësitë tjera të Maqedonisë jashtë vendit.

Deri më tash, shqiptarët nuk kanë pasur deputet që do të përfaqësonte diasporën e tyre.

Sikur asnjëherë më parë, për zgjedhjet e këtij viti janë aktivizuar me të madhe edhe shqiptarët e Maqedonisë që jetojnë jashtë vendit. Në Zvicër gjatë muajve të fundit kandidaturat e tyre i kanë shpallur Ismail Beluli i BDI-së dhe Enver Osmani i RDK-së. Të dytë, me shtabet e tyre dhe të mbështetur nga baza partiake e ardhur nga Maqedonia, kanë zhvilluar fushata të ndara për të kërkuar votën e bashkatdhetarëve, në qytete të ndryshme të Zvicrës.

albinfo.ch ka mbuluar këto aktivitete dhe ka intervistuar dy kandidatët shqiptarë. Ismail Beluli, i cili këtë kandidim e ka të dytin, pas atij të vitit 2011 është i bindur në fitore. Ai pohon se “i njeh më mirë hallet e mërgimtarëve sesa partia e tij që e ka kandiduar”. Politikani shqiptar nga Maqedonia thotë se me fitoren e zgjedhjeve do të bëhet faktorizimi i diasporës shqiptare. Ndërsa Enver Osmani, i cili kandidon për herë të parë zotohet se “do të jetë urë lidhëse e komunitetit shqiptar në diasporë me institucionet e vendit, por njëkohësisht edhe me institucionet e vendit pritës”.  

Sigurisht, një elektorat i bashkuar do të rriste shanset që shqiptarët të kenë një përfaqësues në parlament. Për këtë arsye ka pasur edhe përpjekje për të bashkuar votën e shqiptarëve në Zvicër por, kjo ka dështuar. Sidoqoftë, kjo është demokracia dhe mbetet të shpresohet se do të fitojë më i miri.

Njëkohësisht me zgjedhjet parlamentare, të dielën qytetarët e Maqedonisë votojnë në raundin e dytë edhe për kryetarin e vendit.