Stadiumi “Adem Jashari” gati për miqësoren historike

Pas investimeve emergjente në vlerë 740 mijë euro, Stadiumi Olimpik “Adem Jashari” në Mitrovicë, tashmë i plotëson kushtet e kërkuara nga FIFA dhe UEFA

Stadiumi Olimpik “Adem Jashari” në Mitrovicë është i gatshëm për ndeshjen e parë historike që Kosova do ta zhvillojë kundër Haitit me 5 mars në ora 15. Pas investimeve emergjente në vlerë 740 mijë euro, stadiumi tashmë i plotëson kushtet e kërkuara nga FIFA dhe UEFA për miqësoren e parë.

Stadiumi Olimpik sot u inaugurua nga kryeministri Hashim Thaçi, i cili u shoqërua nga ministri i Kulturës, Rinisë dhe Sportit, Memli Krasniqi dhe kryetari i Federatës së Futbollit të Republikës së Kosovës, Fadil Vokrri.

Kryeministri Thaçi u shpreh i impresionuar me punën që është bërë gjatë renovimit të stadiumit olimpik në Mitrovicë, i cili sipas ekspertëve, i përmbushë standardet e UEFA-s dhe FIFA-s.

“Dëshiroj të falënderoj ministrin e Sportit, Memli Krasniqi, kryetarin e Federatës së Futbollit, Fadil Vokrri, për punën e jashtëzakonshme që kanë bërë në internacionalizimin e sportit kosovar dhe në krijimin e mundësive për të zhvilluar ndeshjet e para ndërkombëtare të futbollit për Kosovën”, tha kryeministri Thaçi.

Ai tha se Qeveria e Kosovës do të vazhdojë të investojë në sport, edhe në renovimin e stadiumeve tjera anekënd Republikës së Kosovës.

“Pres që të mërkurën të kemi edhe ndeshjen e parë historike mes Kosovës dhe Haitit, por të kemi edhe festë, të shpresojmë natyrisht fuqishëm se Kosova do të fitojë”, u shpreh kryeministri Thaçi.

Ky stadium, ku luan Trepça, njëri nga ekipet më të suksesshme të Kosovës, i cili dikur ka luajtur edhe në finalen e kupës së ish-Jugosllavisë, ka një kapacitete prej 18 mijë ulësesh. Po ashtu e veçanta e këtij stadiumi është se shumica e pajisjeve të ish-stadiumit “Rasunda” të Suedisë, i cili është mbyllë vitin e kaluar, i ka marrë ky stadium.  

Ndryshe, tashmë janë shitur të gjitha biletat për ndeshjen e parë miqësore, që Kosova e luan kundër Haitit. Biletat në treg kanë kushtuar 5, 7 dhe dhjetë euro, ndërsa në të  zezë po shkojnë deri 100 euro.