Stefanoviq thotë se Serbia respekton vendimin e UNMIK-ut për zgjedhjet

Qeveria e Serbisë duket se ka hequr dorë nga mbajtja e zgjedhjeve lokale në territorin e Kosovës edhe pse nuk e ka deklaruar zyrtarishtë.

Shefi i delegacionit serb në dialogun Kosovë – Serbi, Borisllav Stefanoviq, ka thënë se qeveria në Beograd e respekton këtë qëndrim pasi misioni i përkohshëm i OKB-së në Kosovë është i vetmi që mund ta interpretojë Rezolutën 1244 të Këshillit të Sigurimit të OKB-së.

“UNMIK-u është mbikëqyrësi i vetëm politik i Rezolutës 1244. Ky mision nuk është më aq i rëndësishëm, por ata janë të vetmit që e mbikëqyrin atë. Ne i pyetëm ata për zgjedhjet dhe ata na thanë se nuk mund të lejojnë zgjedhje lokale në Kosovë dhe ne e respektojmë atë përgjigje”, ka thënë Stefanoviq.

Qeveria e Serbisë, megjithatë, nuk thotë se kjo nënkupton vendim final të shtetit fqinj të Kosovës për zgjedhjet.

Beogradi jozyrtarisht e pranon se nuk ekziston asnjë formulë tjetër që do të mundësonte mbajtjen e zgjedhjeve për pushtetin lokal në territorin e Kosovës.

Një tjetër zyrtar i Qeverisë së Serbisë ka thënë në kushte anonimiteti se Qeveria e Serbisë as që po merret më me këtë çështje pasi e di që asgjë nuk mund të bëhet në këtë drejtim. /albinfo&zëri/