Stuhia ‘Ciara’ ua merr jetën së paku shtatë personave

Erëra të fuqishme të stuhisë Ciara shkaktuan dëme dhe vdekjen e disa personave gjithandej Evropës.

Kështu, erërat e fuqishme në Poloni shkatërruan çatinë e një dyqani, duke vrarë një grua dhe dy vajzat e saj. Babai i tyre u plagos.

Një burrë vdiq pasi varka e tij u fundos në jug të Suedisë. Një person tjetër që gjendej në bord ende konsiderohet i zhdukur.

Dy veta u vranë në makinat e tyre, njëri në Gjermani dhe tjetri në Slloveni.

Shpejtësia e erës deri në 200 kilometra në orë u regjistrua edhe në veri të Italisë. Një grua rreth 71 vjeçe u vra, pasi u godit nga copat e një çatie në rajonin e Lombardisë.

Ciara, e njohur edhe si stuhia Sabine, ka shkaktuar dëme të mëdha materiale në disa pjesë të Evropës.

Transporti u ndalua dhe shkollat u detyruan të mbyllen nëpër Belgjikë, Gjermani, Luksemburg dhe Holandë. albinfo.ch