Stuhia “Havier” dridh Gjermaninë

Një stuhi e fuqishme goditi veriun e Gjermanisë, duke shkaktuar të paktën shtatë të vdekur e dhjetëra të plagosur. Stuhia ka shkaktuar probleme në qarkullimin rrugor, hekurudhor e ajror në këto rajone.
Stuhia e quajtur “Havier” shkaktoi 4 viktima vetëm në shtetin federal gjerman të Brandenburgut.

Erërat e forta rrëzuan edhe një vinç të madh me peshë rreth 1 mijë tonë në portin e Vilhelmshavenit.

Bllokimi i binarëve nga pemët e thyera ka shkaktuar pezullimin e disa linjave hekurudhore, kryesisht në shtetet federale të Shlesvig- Holshtajnit e Saksonisë së Ulët.

Edhe në linjën hekurudhore që lidh Berlinin me Hamburgun pati bllokime të pjesshme të transportit hekurudhor. Bllokime ka edhe në qarkullimin rrugor, por edhe në transportin ajror. Madje, për shkak të erërave të forta u pezulluan disa fluturime ndërkombëtare nga aeroporti i Bremenit.

Shpejtësia maksimale e erërave të stuhisë “Havier” arriti në 113 km/orë. Autoritetet në Berlin urdhëruan vendosjen e ekipeve të emergjencës në nivelin më të lartë të gatishmërisë.

Në veri dhe në lindje të Gjermanisë trafiku u bllokua në shumë vende. Punonjësit e shpëtimit i nxitën njerëzit të qëndronin në shtëpi për shkak të sigurisë së tyre. Dëmi ka të ngjarë të shkojë në miliona euro.