Suedia: Sërish viza për vendet e Ballkanit?

Qytetarët e vendeve të Ballkanit mund të mos gëzojnë të drejtën për të udhëtuar pa viza në zonën e Shengenit

Qeveria suedeze, sipas ministrit të Migrimit, Tobias Bilstrom, e mbështet kërkesën për vendosjen serishme të vizave, transmetojnë mediat në Shkup.

 

“Shkak për këtë është numri shumë i madh i kërkesave të pabaza për marrjen e azilit, me çka për momentin rreth 20 për qind nga  azilkërkuesit në Suedi vijnë nga vendet të cilat kanë liberalizim të vizave”, thotë ministri Bilstronm.

 

Sipas autoriteteve suedeze bëhet fjalë për Serbinë, Maqedoninë, Shqipërinë dhe Bosnjën.

 

Siç transmeton INA, gjatë këtij viti në Suedi janë regjistruar përafërsisht 3.000 azilkërkues nga Serbia dhe mbi 1.900 nga Bosnja e Hercegovina.

 

Gjithsej 98 për qind nga të gjitha kërkesat e parashtruara për azil nga vendet ballkanike marrin përgjigje negative në instancën e shkallës së parë në Suedi, Entin e migrimit.

 

Përveç Suedisë, azilkërkuesit ballkanik orientohen drejt Gjermanisë, Belgjikës, Holandës dhe Danimarkës.

 

Ministri suedez i Migrimit nuk dëshiron ta komentojë mënyrën në të cilën do të zbatohej e ashtuquajtura klauzola e suspendimit, duke theksuar se më parë duhet të precizohen hollësitë konkrete lidhur me vendosjen e përkohshme të vizave,  që mund të ndodh në fillim të vitit të ardhshëm.

 

Por, sipas Bilstrom, me rëndësi është të kanalizohen kërkesat drejt organeve dhe politikanëve kompetent në vendet ballkanike,  kur bëhet fjalë për politikat në lidhje me pozitën e pakicave dhe para se gjithash  kur  bëhet fjalë për romët, njoftoi radioja suedeze.

 

---