Sulm kibernetik ndaj aeroporteve të Milanos nga një grup pro-rus

Ilustrim, Pixabay

Hakerët shënjestruan sot rreth dhjetë faqe zyrtare në Itali, duke përfshirë faqet e internetit të Ministrisë së Jashtme dhe dy aeroportet e Milanos, duke i nxjerrë ato jashtë funksionit përkohësisht, tha agjencia e sigurisë kibernetike e vendit, sipas “Reuters”.

Grupi pro-rus i hakerëve Noname057(16) mori përsipër sulmin kibernetik në Telegram, duke thënë se rusofobët e Italisë po marrin një përgjigje të merituar kibernetike.

Një zëdhënës i agjencisë së sigurisë kibernetike të Italisë tha se ishte e besueshme që sulmi i ashtuquajtur “Mohimi i Shërbimit i Shpërndarë” (DDoS) mund të lidhej me grupin pro-rus.

Zëdhënësi tha se agjencia kishte ofruar ndihmë të shpejtë për institucionet dhe kompanitë e shënjestruara dhe se ndikimi i sulmit ishte “zbutur” në më pak se dy orë.

“Sulmi kibernetik nuk ka shkaktuar asnjë ndërprerje në fluturimet në aeroportet Linate dhe Malpensa të Milanos”, tha një zëdhënës i SEA, kompania që i menaxhon ato.

“Ndërsa faqet e internetit ishin të paarritshme, aplikacionet celulare të aeroporteve vazhduan të funksionojnë”, shtoi zëdhënësi i SEA.