Sveçla: Serbia t’i dorëzojë terroristët që po trajtohen në Novi Pazar

Ministri i Punëve të Brendshme i Kosovës, Xhelal Sveçla, në konferencën e jashtëzakonshme ka kërkuar nga Serbia t’i dorëzojë gjashtë terroristët që kanë mbetur të plagosur nga sulmi i së dielës, të cilët po trajtohen në spitalin e Novi Pazarit.

“Asnjë person civil nuk është lënduar nga ky aksion, sipas informatave të deritashme, 6 terroristë të plagosur po trajtohen në spitalin e Novi pazarit. Kërkojmë nga Serbia ata t’ua dorëzojë menjëherë autoriteteve të Kosovës që t’iu përgjigjen drejtësisë për aktet e tyre terroriste. Po ashtu, edhe çfarëdo pjesëtari i këtij grupi që ka arritur të ikën në Serbi, kërkojmë nga Serbia të dorëzojë”, ka thënë ai.

Ai ka njoftuar se në armatimin që kanë sekuestruar, ka armë që janë të vitit 2021 të ushtrisë serbe, ndërsa konfirmoi se në objektet brenda Manastirit, janë gjetur harta, e plane që tregojnë për planin, përcjell albinfo.ch.

“Organizim terrorist i urdhëruar nga Beogradi nuk ka të bëjë me organizim të shpejtë. Në materiale kemi gjetur dokumente të kriminelit Milan Radojçiq. Ka pasur përfshirje të qindra personave, ka armë ushtarake të vitit 2021 që janë furnizim nga Ushtria e Serbisë. Serbia po shfrytëzon kriminelët”, ka deklaruar ai.