SVP/UDC, referendum kundër lëvizjes së lirë me Kroacinë

Kryetari i SVP/UDC-së, Toni Brunner do të angazhohet që Zvicra të mos e zgjerojë edhe në raport me Kroacinë marrëveshjen që e ka me shtetet tjera të BE-së për lëvizjen e lirë të njerëzve

SVP/UDC është kundër qëndrimit të Këshillit Federal (qeverisë) për zgjerimin e lëvizjes së lirë edhe në Ballkan, gjegjësisht synimin për nënshkrimin e marrëveshjes me Kroacinë. Në rast se qeveria megjithatë e nënshkruan këtë marrëveshje, kryetari i SVP-së, Toni Brunner ka paralajmëruar referendum për të kundërshtuar atë.

Brunner mendon se migrimi i qytetarëve të BE-së në Zvicër nuk bën të rritet edhe më tutje. Për këtë arsye ai do të angazhohet që Zvicra të mos e zgjerojë edhe në raport me Kroacinë marrëveshjen që e ka me shtetet tjera të BE-së për lëvizjen e lirë të njerëzve.

“Nga këndvështrimi im, një referendum për këtë çështje do të ishte legjitim”, ka thënë ai në një intervistë për gazetën e të dielës, “Ostschweiz am Sonntag”.

Brunner më tutje ka folur edhe për zgjedhjen e qeverisë së vendit me votën e drejtpërdrejtë të popullit.

“Nëse duam që Këshilli Federal të ketë ndikim më të fuqishëm në politikën e migracionit, na duhet që të kemi një Këshill Federal të zgjedhur nga populli. Me këtë do të arrinim që përmes një ndryshimi të vogël, duke e bartur kompetencën zgjedhore nga parlamenti te populli, të shpërfaqim besimin që kemi në popullin tonë”, është shprehur kryetari i SVP/UDC-së.

Me këtë deklarim ai e ka hapur praktikisht fushatën për iniciativën e SVP-së për zgjedhjen e qeverisë nga populli. Kjo iniciativë do të hidhet në votim më 9 qershor.