Tahiri mohon akuzat për përfshirje në rrjetin e trafikut të drogës

Pas akuzave për përfshirje në rrjetin e trafikut ndërkombëtar të marihuanës me kushërinjtë e tij, Habilaj, ish-ministri i Brendshëm i Shqipërisë, Saimir Tahiri, ka reaguar duke mohuar që është pjesë e tij.

Tahiri ka kërkuar ndjesë vetëm për shitjen e një veture, siç ka thënë ai, pa kryer verifikimet e duhura se kujt po ia shiste, përcjell albinfo.ch.

“E pavarësisht se në vendin tonë rrallë ndodh që të bëhen këto verifikime, e më të shumtë janë ata që i fshehin e i çojnë në emra të tjerë. Unë përsëri mbaj përgjegjësi morale të plotë për këtë veprim. Përtej kësaj, s’kam pasur dhe s’kam asnjë raport të çfarëdollojshëm dhe aq më pak raport të paligjshëm. Nuk kam asnjë përgjegjësi më shumë dhe dënoj çdo veprimtari kriminale të kujtdo qoftë, edhe të këtyre që i kam kushërinj, të gradës së dhjetë, që as kanë hezituar të përdorin emrin tim dhe shpresoj që drejtësia t’i hetojë deri në fund e t’i dënojë, siç u takon atyre dhe kujtdo tjetër në bazë të ligjit”, ka deklaruar ish-ministri Tahiri.

Por, sipas Tahirit, ai nuk është i pari politikan, të cilit ia keqpërdorin emrin kriminelët.