Takimi i NATO-s, nën masa të rrepta sigurie

Ilustrim, Pixabay

Në Lituani mbahet takimi i vendeve anëtare të NATO-s më 11 dhe 12 korrik, që këtë herë është vetëm 151 kilometra larg Rusisë dhe vetëm 32 kilometra larg kufirit me Bjellorusinë, që është aleate e Rusisë.

Për këtë arsye, gjashtëmbëdhjetë vende të NATO-s kanë dërguar rreth 1000 trupa për të siguruar takimin. Shumë prej aleatëve po ofrojnë gjithashtu sisteme të avancuara të mbrojtjes ajrore, të cilat u mungojnë shteteve baltike, shkruan Zëri i Amerikës.

“Do të ishte e papërgjegjshme ta kishim qiellin tonë të pambrojtur pasi Presidenti Biden dhe udhëheqësit e 40 vendeve mblidhen këtu”, tha Presidenti lituanez, Gitanas Nauseda, përcjell albinfo.ch.

Gjermania dislokoi 12 automjete lëshuese të raketave Patriot, armë që eliminojnë raketat balistike, raketat e komanduara dhe avionët luftarakë.

Spanja ka dërguar një sistem të mbrojtjes ajrore NASAMS, Franca po dërgon topat lëvizës special Caesar. Finlanda dhe Danimarka po vendosin avionë luftarakë në Lituani, ndërsa Britania dhe Franca po ofrojnë kapacitete kundër dronëve, shkruan Zëri i Amerikës.

Polonia dhe Gjermania dërguan forca të operacioneve speciale me helikopterë.

Të tjerët po dërgojnë kapacitete për t’u përballur me çdo sulm të mundshëm kimik, biologjik, radiologjik dhe bërthamor, përcjell albinfo.ch.