Të izoluarit e festojnë Ditën e Evropës

Me shumë aktivitete festive, kulturore e artistike, por edhe me disa protesta studentore, kosovarët e shënua 9 Majin- Ditën e Evropës

Kosova është vendi më i izoluar në Evropë, ndërsa institucionet e saj dhe populli kosovar është i vetmi në rajon që e feston zyrtarisht 9 Majin- Ditën e Evropës. Me shumë aktivitete festive, kulturore e artistike, por edhe me disa protesta studentore, sot u shënua ditës e Bashkimit Evropian.

Institucionet e Kosovës të premten e kanë pasur ditë pushimi. Ndërsa disa qytetarë edhe kanë protestuar duke kërkuar liberalizim vizash. Madje dëshirën për liberalizim të vizave kosovarët e kanë shënuar dhe në copa letra të cilat janë vendosur në “Pemën e dëshirave”, që ka qenë performancë e studentëve të UP-së.

Ndërsa në stadiumin e qytetit u zhvilluan lojëra sportive që simbolizojnë edhe integrimin nëpërmjet sportit.

Kandidati i pavarur për president, Seremb Gjergji, bashkë me djalin Drinin e vajzën Djellën, kërkuan para Zyrës së Bashkimit Evropian në Prishtinë, liberalizimin e vizave për qytetarët e Kosovës. Ai tha se kosovarët e meritojnë liberalizimin më shumë se cilido vend tjetër në Ballkan.

Nuk e meritojmë të jemi të mbyllur, kur e gjithë bota po lufton të jetë e hapur dhe jashtë izolimit! I thërras të gjitha vendeve të BE-së që para zgjedhjeve në Parlamentin Evropian të veprojnë drejt e ta ç’izolojnë Popullin e Kosovës. Populli ynë nuk duhet të jetë peng i politikës apo interesave të ngushta. Populli ynë duhet të jetë i lirë”, tha Dedaj

Drin dhe Diella Gjergji, sipas tij, përveç gjuhës amtare, flasin shkëlqyeshëm gjermanisht dhe anglisht.

Eksperti i integrimeve evropiane, Shenoll Muharremi, i ka thënë REL-it se afatete që i kanë dhënë institucionet e Kosovës për heqjen e vizave, janë irreale.  

Muharremi konsideron se është koha e fundit ku Qeveria e Kosovës dhe Bashkimi Evropian duhet të ulen dhe të shkojnë se si të instalohet një afat kohor më serioz edhe për zbatimin e kritereve që kanë mbetur nga udhërrëfyesi, por edhe si të përfundojë ky proces.

Ndryshe, eurodeputetja Ulrike Lunacek ka thënë kohë më parë se gjatë këtij viti nuk duhet të pritet një vendim për liberalizim të vizave për shtetasit e Kosovës. Madje, sipas saj, procesi i liberalizimit mund të zgjasë dy apo tri vjet. Mirëpo në Prishtinë, institucionet janë optimist se brenda vitit tjetër do të ndodhë liberalizmi.  

Ndryshe, një ditë më parë, ministri i Jashtëm, Enver Hoxhaj ka thënë se Bashkimi Evropian duhet të lëvizë më shpejt me nënshkrimin e MSA-së për Kosovën, duke i hapur një rrugë të sigurt drejt Brukselit, dhe të caktohet një datë kur qytetarët mund të lëvizin drejt Evropës.

“Dhe unë besoj që një vendim i tillë do të merret në gjysmën e dytë të këtij viti”, ka thënë ministri Hoxhaj. Këto komente ai i ka bërë në Konferencën Ministrore BE-Ballkani Perëndimor në Selanik.