12 vende të BE-së besojnë që do të arrijnë objektivin e vaksinimit deri në korrik

Të paktën 12 nga 27 vendet anëtare të Bashkimit Evropian kanë thënë se kanë besim që do arrijnë të vaksinojnë 70% të popullsisë së tyre të rritur deri në mes të korrikut, tha të martën shefi i forcës së vaksinave të ekzekutivit të BE-së.

Komisioni Evropian ka vendosur një objektiv të vaksinimit të 70% të popullsisë së rritur të BE-së deri në fund të kësaj vere, duke bërë një rritje të madhe të dërgesave të vaksinave për të përshpejtuar vaksinimin.

“Ne jemi të bindur se do të jemi në gjendje të japim doza të mjaftueshme, por është e vërtetë gjithashtu që u takon shteteve anëtare të organizohen që të jenë të gatshëm për këtë”, tha komisioneri i Tregut të Brendshëm Evropian, Thierry Breton.

“Sot mund t’ju them se e kuptoj që kemi të paktën 12 shtete anëtare që thonë se janë plotësisht të kënaqura me këtë shifër prej 70%. Ky numër po rritet në baza ditore”. Ai nuk i identifikoi 12 vendet anëtare që kishin besim për arritjen e këtij targeti, shkruan “Reuters”, përcjell albinfo.ch.