Dita e 12-të e protestave kundër Qeverisë së kryeministrit Edi Rama në Shqipëri është shoqëruar me tensione dhe përplasje mes protestuesve dhe forcave të policisë në Tiranë, përcjell albinfo.ch.
Tensionet janë përshkallëzuar të shtunën, më 24 tetor, para Ministrisë së Arsimit, ku një pjesë e protestuesve kanë hedhur gurë në drejtim të ndërtesës dhe efektivëve të policisë.
Sipas raportimeve të mediave shqiptare, disa të rinj u kanë vënë flakën koshave të mbeturinave, ndërsa policia ka ndërhyrë duke përdorur gaz lotsjellës dhe ujë për shpërndarjen e turmës.
Pas ndërhyrjes së policisë, protestuesit janë shpërndarë në disa drejtime, përfshirë Sheshin Skënderbej dhe Bulevardin Dëshmorët e Kombit.
Në protestën e së shtunës janë bashkuar studentë, pedagogë, përfaqësues të profesioneve të ndryshme dhe qytetarë nga disa qytete të Shqipërisë.
Protestat, të cilat kanë nisur më 13 tetor, fillimisht u organizuan nga studentët për shkak të pakënaqësive lidhur me kostot e arsimit, kushtet në universitete dhe mungesën e perspektivës ekonomike.
Me kalimin e ditëve, protestat janë zgjeruar, duke përfshirë edhe qytetarë të pakënaqur me koston e jetesës, korrupsionin dhe mënyrën e qeverisjes.
Një nga kërkesat kryesore të protestuesve mbetet dorëheqja e kryeministrit Edi Rama dhe e Qeverisë së tij.
Ndërkohë, Rama ka deklaruar se është i gatshëm për dialog me studentët që protestojnë në mënyrë paqësore, por ka përjashtuar mundësinë e dorëheqjes.
Protestat e ditëve të fundit janë shoqëruar me incidente të dhunshme, persona të lënduar dhe ndërhyrje të policisë, ndërsa organizatat e shoqërisë civile kanë kërkuar hetimin e pretendimeve për përdorim të tepruar të forcës ndaj protestuesve.
Zhvillimet në Shqipëri kanë nxitur edhe reagime ndërkombëtare, me thirrje për shmangien e dhunës, respektimin e së drejtës për protestë paqësore dhe përdorimin proporcional të forcës nga autoritetet./Albinfo.ch
