Lufta në Lindjen e Mesme, rriten çmimet e naftës

@pixabay

Lufta në Lindjen e Mesme po krijon tensione edhe në tregjet e naftës. Në bursa, çmimi është rritur 2% këtë të martë, ndërsa ekspertët i druhen hakmarrjes së Izraelit që mund të prekë depozitat dhe rafineritë në Iran.

Çmimet e naftës kanë shënuar rritje pas sulmit me raketa të Iranit ndaj Izraelit. Nafta e papërpunuar Brent, që kuotohet në bursat europiane, është rritur 2%, duke arritur në 75 dollarë për fuçi, dhe në njëjtin nivel është rritur edhe çmimi në SHBA, duke u tregtuar në 72 dollarë për fuçi.

Rritja e tensioneve në rajon ka sjellë shqetësime në tregjet financiare. Sipas ekspertëve të tregjeve, frika për rritje të çmimit qëndron nëse Izraeli do të sulmonte, përveç objekteve ushtarake, edhe rafineritë e Iranit.

“Nëse Izraeli gjymton industrinë e naftës së Iranit, tregjet globale do të ishin në tension të madh,” shkroi Stephen Innes, partner menaxhues në SPI Asset Management.

Irani është një nga prodhuesit më të mëdhenj dhe anëtar i Organizatës së Vendeve Eksportuese të Naftës (OPEC), dhe në prodhimin botëror zë 4% të prodhimit.

Irani eksporton pjesën më të madhe të naftës në Kinë për shkak të sanksioneve të gjata ndërkombëtare, por analistët kanë thënë më parë se një reduktim i këtyre eksporteve do të kishte një ndikim masiv në tregje.

Përveç naftës, pasiguria ka prekur gjithashtu edhe stoqet globale në tregjet e tjera të mallrave. Me përjashtim të Hong Kongut, shumica e tregjeve aziatike të aksioneve pësuan rënie pas shitjeve në Wall Street.