Thaçi njofton lidershipin për takimin me Daçiqin

Kryeministri Thaçi ka takuar ambasadorët e shteteve të Quint-it, liderin e opozitës, Isa Mustafa, presidenten Jahjaga..

Kryeministri Kosovës, Hashim Thaçi i ka takuar përfaqësuesit e institucioneve vendore dhe atyre ndërkombëtare të akredituar në Kosovë, për t’i njoftuar lidhur me takimin e fundit me homologun serbe, Ivica Daçiq, dhe për përkushtimin e qeverisë së Kosovës për vazhdimin negociatave me Serbinë.

Kryeministri Thaçi ka takuar fillimisht ambasadorët e shteteve të Quint-it, me qëllim të informimit lidhur me vizitën në Bruksel, ndërsa e falënderoi pesëshen ndërkombëtare për mbështetjen e dhënë në këtë proces.

Kryeministri kosovar ka siguruar ambasadorët që procesi i normalizimit të marrëdhënieve ndërmjet shtetit të Kosovës dhe Serbisë do të vazhdojë për të mirën e të dyja shteteve dhe rajonit në tërësi.

Thaçi më pas njofton anëtarët e Kryesisë së partisë sëtij-PDK-së për  takimin në Bruksel, ndërsa një takim të veçantë zhvilloi edhe me presidenten Atifete Jahjaga, liderin e opozitës, Isa Mustafa dhe përfaqësuesit e AAK-së, Blerim Shala.

“Kryeministri Thaçi e vlerësoi takimin si konstruktiv, të zhvilluar ndërmjet të barabartëve, që ndihmon në normalizimin e marrëdhënieve ndërmjet dy shteteve në kuadër të ndërtimit të politikave të fqinjësisë së mirë, kusht ky për integrimin e shteteve në Bashkimin Evropian.

Kryeministri theksoi se vazhdimi i dialogut dhe zbatimi i plotë i të gjitha marrëveshjeve është në funksion të paqes, stabilitetit dhe bashkëpunimit rajonal”, thuhet në njoftimin e Presidencës së Kosovës pas takimit me kryeministrin.

Edhe presidentja Jahjaga i dha mbështetje kryeministrit Thaçi për vazhdimin e bisedimeve.

 “Vazhdimi i procesit të dialogut lehtëson jetën e qytetarëve të të dyja shteteve dhe është kontribut për paqen e stabilitetin dhe për suksesin e rrugës evropiane në të cilën dy shtetet e pavarura e sovrane, Kosova dhe Serbia, shkojnë duke i ndihmuar dhe jo duke e penguar njëra-tjetrën”, konsideron Jahjaga.

Kryeministri kosovar në mbledhjen e Qeverisë nuk harroi të komentoj edhe protestën e Vetëvendosjes, për të cilën tha se po zhvillohet nga grupe të izoluara të aktivistëve.