Themelimi i Agjencisë për Shërbimet e Navigacionit Ajror, i rëndësishëm

Në Suedi janë duke u trajnuar dhe shkolluar studentë, të cilët në vitin 2014 pritet t’i kthehen Kosovës për të dhënë kontributin e tyre

Projektligji për Themelimin e Agjencisë për Shërbimet e Navigacionit Ajror, është vlerësuar shumë e rëndësishëm për vendin, gjatë dëgjimit publik në Komisionin për Zhvillim Ekonomik, Infrastrukturë, Tregti dhe Industri i Kuvendit të Kosovës.

Pasi hapësirat ajrore të Kosovës nuk kanë qenë kompetencë e vendësve, por e KFOR-it, tash me avancimin e situatës politike dhe ekonomike paraqitet nevoja të hartohen ligje të tilla, për të marrë vet përgjegjësitë dhe kompetencat, u tha në këtë Komision.

Për të formuar kapacitete njerëzore për këtë qëllim, në Suedi janë duke u trajnuar dhe shkolluar studentë, të cilët diku në vitin 2014 pritet t’i kthehen Kosovës për të dhënë kontributin e tyre në këtë sferë.