Themelohet Komiteti Monitorues për Marrëveshjen e normalizimit Kosovë-Serbi

pixabay

Të martën Bashkimi Evropian tha se është formuar Komiteti i Përbashkët Monitorues për të mbikëqyrur zbatimin e Marrëveshjes për normalizimin e marrëdhënieve mes Kosovës dhe Serbisë, përcjell albinfo.ch.

Komiteti i Përbashkët i Monitorimit do të kryesohet nga i dërguari i posaçëm i BE-së për bisedimet, Miroslav Lajçak. Kosova do të përfaqësohet nga ambasadori i saj në Bruksel, Agron Bajrami dhe Serbia nga kryenegociatori i saj, Petar Petkoviç, shkruan Zëri i Amerikës.

Sipas njoftimit të BE-së, komiteti do të takohet rregullisht në Bruksel dhe detajet e tjera do të bëhen të ditura pas takimit të parë që pritet të zhvillohet pas takimit në nivel të lartë të negociatorëve më 2 maj, shkruan Zëri i Amerikës.

Kosova dhe Serbia më 18 mars në Ohër arritën marrëveshje për normalizim të marrëdhënieve dhe dakordim për aneksin e zbatimit të kësaj marrëveshjeje. Brenda 30 ditëve palët u obliguan të formojnë edhe Komitetin e Përbashkët Monitorues të zbatimit të aneksit, përcjell albinfo.ch.