Tiranë, sërish përleshje për “Parkun”

Kanë vazhduar edhe sot protestat kundër parkut të lojërave te liqeni artificial i Tiranës. Protestuesit janë përplasur edhe ditën e sotme me Policinë Bashkiake të Tiranës, pasi tentuan të shkatërrojnë gardhin rrethues tek vendi ku po kryhen punime brenda parkut të liqenit.

Protesta është organizuar nga Partia Demokratike dhe në vendngjarje janë të pranishëm edhe disa deputetë demokratë, shkruajnë mediet shqiptare. Protestuesit kanë mundur të shembin rrethimin me hekura që vendosi Bashkia e Tiranës ditën e djeshme, pas protestës së shoqërisë civile. Edhe pse me tela, është shkatërruar i gjithë rrethimi ku po kryhen punimet.

Gjatë përleshjeve mes protestuesve dhe policisë bashkiake në protestën tek liqeni, u lënduar edhe një vajzë. Nuk dihet identiteti i saj, ndërkohë që ajo pësoi disa lëndime për shkak të një goditje që ka marrë gjatë përleshjeve, megjithatë nuk ka dëmtim serioz.