Tragjedi në Gjilan, xhaxhai vret nipin e më pas edhe veten

Xhaxhai 54 vjeçar ka vrarë sot në Gjilan nipin e tij 30 vjeçar më pas dhe vetën. Mësohet se dy të vdekurit nuk kishin raporte të mira që kur u ndanë në biznes para 5 vjetëve

Qyteti i Gjilanit, që njihet si më i qeti në Kosovë, është tronditur sot paradite me një vrasje të dyfishtë që ka ndodhur në qendër të qytetit. Tragjedinë më të madhe e bënë fakti, se të vrarët janë të të njëjtës familje, madje thuhet se xhaxhai ka vrarë nipin dhe më pas edhe vetën. Konflikti duket se ka ndodhur për shkaka të biznesit, pasi dy të vrarët kishin këmbimore.

Siç raportojnë mediat lokale, xhaxhai 54 vjeçar Njazi Bunjaku e vrau nipin e tij 30 vjeçar nehat Bunjakun e më pas edhe vetën.

“Një person familjar i afërt i viktimës fillimisht ka hyrë në një lokal që është këmbimore dhe pas një kohe që ka qëndruar aty ka shkrep ama e zjarrit, revole, dhe e ka godit viktimën nga afërsia ku si pasojë e plagëve nga arma e zjarrit viktima ka vdekur menjëherë në vendin e ngjarjes”, tha Ismet Hashani, zëdhënës i policisë për rajonin e Gjilanit.

Edhe i dyshimti e ka goditur veten duke u lënduar rëndë dhe ka mbet në të njëjtin lokal.

Sipas Policisë, ai është dërguar në Qendrën Klinike Universitare në Prishtinë dhe përkundër ndihmës dhe përkundër përpjekjeve nga ana e mjekëve ai ka ndërruar jetë.

Policia ende nuk i ka të qarta motivet e kësaj vrasje por ata që i njihnin Njazi dhe Nehat Bunjakun thonë se ata vitet e fundit nuk komunikonin në mes vete.

Të dy viktimat kishin lokale të këmbimoreve afër njëri-tjetrit. Edhe shtëpitë në lagjen Dheu i Bardhë të Gjilanit i kishin afër. Derisa shtëpia e dorasit ishte e mbyllur ajo e të riut ishte e hapur dhe familjarët prisnin e përcillnin njerëz. Nehat Bunjaku la pas vetes 2 fëmijë.