Tragjedia e dy fëmijëve keqpërdoret nga politika

Sot pasdite në Prishtinë ka ndodhur një aksident i rëndë që për pasojë ka pasur vdekjen e dy fëmijëve, vëlla e motër. Rasti tragjik është shfrytëzuar mjerisht edhe për qërime hesapesh politike

Sot pasdite në Prishtinë ka ndodhur një aksident i rëndë që për pasojë ka pasur vdekjen e dy fëmijëve, vëlla e motër.

Aksidenti ka ndodhur në lagjen Kolovica të Prishtinës ku kanë humbur jetën dy fëmijë, pasi kanë rënë në një gropë e cila ka qenë aty e hapur prej kohësh.

“Rreth orës 14:00 kemi marrë një informatë se një fëmijë ka rënë në një gropë. Me të dalë në vendin e ngjarjes është bërë e ditur se bëhet fjalë për dy veta”.

“Nga aty janë nxjerr dy trupa të pajetë, një djalë i moshës 11 vjeçare dhe një femër 13 vjeçare”, ka thënë Flora Ahmeti nga Policia e Kosovës për Klan Kosova.

Ahmeti ka thënë se vdekjen e fëmijëve e ka konstatuar në vendin e ngjarjes ekipi mjekësor.

Ndërkohë rasti i rëndë është bërë edhe shkas për përplasje në mes të përfaqësuesve të pozitës dhe opozitës, në nivel të vendit dhe të Prishtinës. Kështu, LDK ka kërkuar përgjegjësi nga kryetari aktual i Prishtinës, Shpend Ahmeti dhe partia e tij VV. Ndërsa Ahmeti është përgjigjur se bashkëndjen me familjen dhe se jeta e dy fëmijëve është më e shtrenjtë se çdo post politik. Por ai ka theksuar se kundërshtarët politikë po e shfrytëzojnë tragjedinë për të qëruar hesapet politike.

Ndërkohë ngushëllime për tragjedinë. Familjes i kanë dërguar presidenti i vendit Hashim Thaçi, kryeministri, Isa Mustafa dhe kryetari i Kuvendit, Kadri Veseli.

Kryeministri Isa Mustafa ka reaguar ndaj tragjedisë  që ka ndodhur në Kolovicë ku dy fëmijë kanë humbur jetën në një gropë të hapur nga kompanitë e ndërtimit që kanë funksionuar në Komunën e Prishtinës, pikërisht në kohën kur ka qenë kryetar i saj, duke thënë se ndjehet i prekur nga tragjedia.

Në telegramin ngushëllues të Isa Mustafës si kryeministër nuk përmendet fare fakti se kjo gropë është hapur në kohën sa ka qenë kryetar i Prishtinës, shkruan insajderi.com.

“Ndjehemi thellësisht të prekur nga kjo humbje e madhe për ju dhe për tërë Kosovën. Me dhimbje dhe pikëllim të pamasë morëm lajmin tragjik të humbjes së jetës së dy fëmijëve Tuaj. Qytetarët dhe institucionet e Republikës së Kosovës përjetojnë sot një dhimbje të madhe dhe bashkëndjejnë me ju”, thuhet në telegramin e Mustafës për familjen.

Gërmimet në Kolovicë, janë bërë qysh në kohën kur ka qenë Mustafa kryetar i Prishtinës, ku sic është parë nuk është ndërmarrë asnjë veprim për të ofruar sigurinë në vendin ku është hapur gropa.