Tri raste të dhunës në familje në ditën e fundit të vitit në Kosovë

Tre persona të arrestuar, e më pas njëri prej tyre është liruar për dhunë në familje.

Sipas raportit të Policisë, në ditën e fundit të vitit 2023 tri gra kanë raportuar se kanë pasur dhunë fizike e psikike nga bashkëshortët e tyre.

Në Prishtinë një grua ka raportuar se pas një mosmarrëveshjeje është sulmuar fizikisht nga bashkëshorti i saj. Palët janë intervistuar dhe me vendim të prokurorit, i dyshuari është arrestuar dhe dërguar në mbajtje.

Po ashtu në kryeqytet një grua ka raportuar se përmes telefonit është kanosur nga bashkëshorti i saj, i cili është arrestuar dhe pas intervistimit me vendim të prokurorit është dërguar në mbajtje.

Ndërkaq në Gjakovë është arrestuar një burrë nën dyshimin se i njëjti ka ushtruar dhunë fizike ndaj bashkëshortes së tij. Viktima dhe i dyshuari kanë pranuar tretman mjekësor. Në konsultim me prokurorin, pas intervistimit viktima është dërguar te familjarët e saj, ndërsa i dyshuari është liruar në procedurë të rregullt./Koha.net