Tri konferencave ekonomike nga Kosova në SHBA

Ministri i Punëve të Jashtme, Enver Hoxhaj, është takuar me ambasadorin e Shteteve të Bashkuara të Amerikës, Christopher Dell. Ministri Hoxhaj dhe ambasadori Dell kanë diskutuar për marrëdhëniet bilaterale mes dy shteteve.

Ata janë pajtuar për vullnetin e dyanshëm për forcimin e mëtutjeshëm të këtyre marrëdhënieve, me theks të veçantë në forcimin e bashkëpunimit ekonomik.

Në takim u diskutua edhe për organizmin e tri konferencave ekonomike nga Kosova në Nju-Jork, Kolorado dhe Kaliforni.

Hoxhaj ka bërë të ditur se Ministria e Punëve të Jashtme gjatë këtij muaji do të fokusohet në promovimin e Strategjisë për Diplomaci Ekonomike që është hartuar në bashkëpunim me ekspertë të USAID-it dhe e cila pritet të ketë rezultate të rëndësishme në promovimin e resurseve ekonomike të Kosovës.

Ministri Hoxhaj dhe ambasadori Dell kanë biseduar edhe për proceset integruese të Kosovës në strukturat euroatlantike, për progresin, sfidat dhe perspektivat integruese të Kosovës në Bashkimin Evropian dhe NATO.

Hoxhaj dhe Dell po ashtu kanë biseduar për mundësitë e lidhjes së disa marrëveshjeve bilaterale ndërmjet Kosovës dhe SHBA-ve, përmes të cilave do të konkretizohet forcimi i bashkëpunimit në shumë fusha ndërmjet dy shteteve.