Trotuaret e larta, intervenojnë vetë persona me aftësi të kufizuar

Disa nga këta persona me aftësi të kufizuara, të pajisur me dalta dhe çekiçë, kanë intervenuar në trotuaret e qytetit, për t’i uluar ato, që të kalojnë me karroca lëvizëse

Një grup i personave me aftësi të kufizuara kanë marrë një aksion pune, në Komunën e Gjilanit, për t’i “prishur” trotuaret që i ka ndërtuar komuna. Disa nga këta persona të pajisur me dalta dhe çekiçë kanë intervenuar në trotuaret e qytetit, për t’i uluar ato, që të kalojnë me karroca lëvizëse sepse janë shumë të larta.

Ata deklarojnë se iniciativa për këtë aksion ka ardhur meqë qeverisja komunale e Gjilanit nuk ka shprehur interesim që t’i merrte parasysh kërkesat e tyre për ulje barrierash në shumë pjesë të qytetit dhe si pasojë e kësaj ata janë detyruar që të merrnin këto masa, ngase vlerësojnë se janë të drejta, shkruan sot “koha ditore”.

Ata theksojnë se shumica e trotuareve të cilat shërbejnë për kalimtarët kanë barriera të ngritura në gjatësi prej 20 centimetrash, duke e vështirësuar qasjen e tyre.

Avdil Ibishi është njëri nga personat me aftësi të kufizuara që kanë marrë pjesë në aksionin për uljen e trotuareve. “Ne kemi intervenuar në heqjen e tri barrierave në qytet ku njerëzit me aftësi të kufizuara nuk mund të kalojnë. Do të ndërmarrim edhe hapa të tjerë dhe do të intervenojmë edhe në barrierat që janë në qendër të qytetit, afër komunës”, deklaroi ai.