Trump: Çështja e Groenlandës do të diskutohet në Davos

Presidenti i SHBA-së paralajmëron diskutime për Groenlandën në Davos

Presidenti amerikan Donald Trump ka konfirmuar se do të marrë pjesë në një takim shumëpalësh në kuadër të Forumit Ekonomik Botëror në Davos, ku pritet të diskutohet edhe çështja e Groenlandës, transmeton albinfo.ch.

Trump bëri të ditur se ishte dakorduar për këtë takim gjatë një telefonate që e cilësoi si “shumë të mirë” me Sekretarin e Përgjithshëm të NATO-s, Mark Rutte. Lajmin ai e ka ndarë të hënën përmes platformës së tij online, Truth Social.

Po ashtu, Trump deklaroi se nuk pret rezistencë të madhe nga vendet evropiane lidhur me marrjen e Groenlandës nga Shtetet e Bashkuara. “Nuk besoj se ata do të rezistojnë shumë”, u shpreh ai para gazetarëve në Florida, duke shtuar për territorin arktik: “Ne kemi nevojë për të. Ata duhet ta bëjnë.”

Groenlanda është territor autonom nën sovranitetin e Danimarkës, e cila është anëtare e Bashkimit Evropian dhe NATO-s. Javët e fundit, Trump ka intensifikuar pretendimet ndaj Groenlandës, duke i arsyetuar ato me interesa të sigurisë kombëtare të SHBA-së në Arktik.

Ai ka folur kryesisht për blerjen e territorit, por nuk ka përjashtuar as mundësinë e përdorimit të forcës ushtarake. Të shtunën, Trump e përshkallëzoi më tej retorikën, duke kërcënuar me tarifa ndëshkuese ndaj Gjermanisë dhe vendeve të tjera evropiane të NATO-s, nëse nuk pajtohen që SHBA-të të marrin Groenlandën./Albinfo.ch

---