Trump zbut tonet ndaj emigrantëve, u ofron para e bileta avioni për largime vullnetare

Keystone (AP Photo/Evan Vucci)

Në një kthesë të papritur nga retorika e tij e ashpër ndaj emigracionit të paligjshëm, presidenti amerikan Donald Trump ka propozuar një program vetëdeportimi që përfshin ndihmë financiare dhe bileta ajrore për emigrantët ilegalë që zgjedhin të largohen vetë nga SHBA.

Në një intervistë për rrjetin “Fox Noticias”, Trump u shpreh se prioritet i administratës së tij mbetet largimi i “vrasësve” dhe kriminelëve nga territori amerikan. Por për pjesën tjetër të emigrantëve pa dokumente, presidenti deklaroi se do të zbatojë një qasje më të butë, transmeton albinfo.ch.

“Ne do t’u japim atyre disa para dhe një biletë avioni,” u shpreh Trump. “Nëse janë njerëz të mirë, do të punojmë që ata të kthehen përsëri në mënyrë të ligjshme.”

Trump theksoi gjithashtu nevojën për punëtorë në sektorë të caktuar si hotelet dhe fermat, duke nënvizuar se vendi ka nevojë për fuqi punëtore të besueshme.

“Po e bëjmë vetëdeportimin më njerëzor,” tha ai. “Dhe po ndërtojmë ura për ata që duan të kthehen ligjërisht.”

Ky propozim i ri vjen në një kohë kur debati për emigracionin në SHBA është gjithnjë e më i ashpër dhe mund të sinjalizojë një përpjekje për të zbutur imazhin e administratës përballë votuesve të moderuar.