Twitter-i teston kalimin nga 140 në 280 shkronja

Shefi i kompanisë së Twitter-it, Jack Dorsey ka thënë se parimisht edhe pas kësaj prove, intenca është të ruhen përmbajtjet e shkurta shkrimore

Foto Ilustrim

Deri më tash, shërbimi i njohur i lajmeve të shkurtra “Twitter” ka pasur 140-shin si kufirin e epërm të shenjave (shkronjave) të lejuara për përdorim. Kjo shifër madje është edhe shenja dalluese e shërbimit në fjalë. Por, Twitter-i aktualisht po e teston dyfishimin e shenjave, nga 140 në 280.

Këtë testim është duke e bërë me një grup të vogël të përdoruesve të vet, shkruan welt.de.

Shefi i kompanisë së Twitter-it, Jack Dorsey ka thënë se parimisht edhe pas kësaj prove, intenca është të ruhen përmbajtjet e shkurta shkrimore, transmeton albinfo.ch. Testuesit kanë reaguar në mënyra të ndryshme. Disa me humor e disa të tjerë kanë kritikuar se me këtë hap tweeter-i po e rrezikon identitetin e vet.

Testi do të zhvillohet në pothuaj të gjitha gjuhët e botës përveç në gjuhët: japoneze, kineze dhe koreane. Kjo për faktin se në këto gjuhë edhe ashtu mund të përmblidhet sasi më e madhe e informacionit në më pak shkronja (shenja), thonë përgjegjësit e kompanisë.

Kështu, vetëm 0.4% të “tweet”-eve në gjuhën japoneze arrijnë gjatësinë prej 140 shenjash ndërkohë që në anglishte ky numër shenjash arrihet në 9 % të rasteve, përcjell albinfo.ch. Për më tepër, shumë nga përdoruesit janë të pakënaqur me kufizimin e shenjave që e praktikon tweeter-i.

Kufizimi në 140 shenja te tweeter-i ka mbetur pasi që kur ky shërbim është themeluar, para më shumë se 10 vitesh, ai është ndërtuar mbi bazën e lajemve SMS të telefonit.