U arrestua me 13 kilogram eksploziv, dënohet 13 vjet burg

Sllobodan Gavriq, i cili dy vjet më parë kishte hyrë nga Serbia në Kosovë me rreth 13 kilogram eksploziv, u dënua sot nga Gjykata e Prishtinës me 13 vjet burg

Nën akuzën për terrorizëm, Gjykata Themelore e Prishtinës ka dënuar të mërkurën me 13 vjet burg, shtetasin serb Sllobodan Gavriq, i cili dy vjet më parë kishte hyrë nga Serbia në Kosovë me rreth 13 kilogram eksploziv. Sipas Prokurorisë speciale, i dënuari kishte për qëllim kryerjen e një akti terrorist në Kosovë.

Kryetarja e trupit gjykues, Shahadije Gërguri gjatë leximit të aktgjykimit ka thënë se gjykata e gjetur fajtorë Gavriqin në veprën që ka të bëjë me përgatitjen e kryerjes së veprës penale të terrorizimit.

“I akuzuari Gavriq është fajtorë sepse me veprën e tij ka dashur që qëllimisht ta frikësoj popullatën dhe me qëllim që seriozisht ta destabilizoj dhe ti shkatërroj strukturat me e rëndësishme Kushtetuese, politike, ekonomike dhe sociale të Kosovës, ka përgatitur kryerjen e veprës penale të terrorizmit”, tha gjykatësja.

Më këtë, ai ka përgatitur kryerjen e veprës penale kundër rendit Kushtetues dhe sigurisë së Kosovës, prandaj sipas Gërkurit, gjykata konform dispozitave ligjore e gjykon atë me dënim me burg në kohëzgjatje prej 13 vjetësh.

Ndryshe, Gavriq kishte hyrë në Kosovë në muajin dhjetor të vitit 2014, ndërsa gjatë qarkullimit në lagjen “Arbëria” në Prishtinë ku janë të vendosura ambasadat e huaja,  policia e kishte ndalur veturën “Renault Clio” me targa të Beogardit të cilën po e ngiste Gavriq, dhe në të kishin zbuluar rreth 13 kilogram eksploziv.

Tashmë i dënuari, gjatë gjykimit kishte pranuar se dhe dy herë të tjera kishte hyrë në Kosovë me të njëjtin eksploziv, ndërsa thotë se kishte qenë vetëm transportues. Eksplozivin thotë se ia kishte sjellë një serbi tjetër.